जनादेशविरूद्ध शक्तिकेन्द्रहरुको चलखेल
जनदिशा संवाददाता
काठमाडौं, २६ वैशाख
लोकतन्त्र र जनमतको वकालत गरेर
नथाक्ने अमेरिका र भारतजस्ता शक्तिकेन्द्र संविधानसभा
निर्वाचनमा जाहेर जनादेशविपरीत माओवादीलाई राज्यको
नेतृत्व गर्न नदिने कसरतमा जुटेका छन् ।
अमेरिकी विदेश विभाग प्रवक्ता
सेन म्याककोरम्याकले मंगलबार माओवादीलाई 'आतंकवादी’को
सूचीमा यथावत् राखिएको बताएका थिए । अमेरिकी राजदूत
न्यान्सी जे. पावेल र नेकपा -माओवादी)का अध्यक्ष
प्रचण्डको बीचमा भएको भेटघाटका बारेमा सोधिएको प्रश्नको
जवाफमा म्याककोरम्याकले यस्तो टिप्पणी गरेका थिए ।
संविधानसभा निर्वाचनबाट माओवादी
एकमात्र ठूलो पार्टीका रूपमा अगाडि आएको पृष्ठभूमिमा
अमेरिकी उक्त टिप्पणी लोकतान्त्रिक मूल्य, मान्यताको
सरासर विरुद्ध छ । उक्त अमेरिकी टिप्पणी स्पष्टतः
माओवादीलाई राज्यको नेतृत्व गर्नबाट अवरोध खडा गर्ने
योजनाअन्तर्गत आएको विश्लेषकहरूको भनाइ छ ।
नेपालको परिस्थितिको बारेमा
रिपोर्ट गर्न वासिङ्टन पुगेकी अमेरिकी राजदूत पावेल पनि
अमेरिकामै छिन् ।
भारतको प्रतिष्ठित दैनिक द
हिन्दूले एकहप्ता पहिले सम्पादकीयमा अमेरिका
माओवादीलाई सत्तामा आउनबाट रोक्न समर्पित भएको उल्लेख
गरेको थियो । सम्पादकीयमा लेखिएको छ- प्रधानमन्त्री
गिरिजाप्रसाद कोइरालासहित नेपाली कांग्रेस नेतृत्वको
गुट सत्तामै टाँसिरहन खोजिरहेको छ । यस्ता कदमहरू
मुलुकको नयाँ संविधान लेख्न आवश्यक सहमतिको
स्पिरिटविपरीत छन् कांग्रेस नेतृत्व प्रस्ट रूपमा
अमेरिकाद्वारा उक्साइएको छ, जो (अमेरिका)
माओवादीलाई सत्तामा आउनबाट रोक्न समर्पित छ । नेपाली
सेनाको उच्च नेतृत्व र चाडै अवसान हुने राजदरबार पनि
यो अलोकतान्त्रिक मिसनमा सहभागी छन् ।’
(द हिन्दू, १ मे, २००८)
'नेपाली मतदाताको असली सन्देश
सामाजिक-राजनीतिक स्थायित्व सुनिश्चित गर्न र जनमुखी
विकासको उपयुक्त वातारण बनाउन सबै प्रमुख राजनीतिक
दलहरू संगै काम गर्नुपर्छ भन्ने हो । नेपाली कांग्रेस
र एमालेसहितको गठबन्धन सरकारको नेतृत्व गर्ने सबभन्दा
ठूलो दलका हैसियतले माओवादीको लोकतान्त्रिक अधिकारमा
कुनै इन्कार हुनुहुँदैन,’ द हिन्दूमा लेखिएको छ ।
तर, भारतीय संस्थापनको एक पक्ष
संविधानसभा निर्वाचनमा लज्जाजनक पराजय भोगेको
कांग्रेसका सभापति गिरिजाप्रसाद कोइरालालाई
राष्ट्रप्रमुख बनाउने कसरतमा जुटेको स्रोतहरूको दाबी छ
। जुन स्पष्टतः निर्वाचनमा अभिव्यक्त जनादेशको विरुद्ध
हुन जान्छ ।
यसैबीच, भारतीय राजदूत राकेश
सुदले बुधबार मात्रै प्रधानमन्त्री कोइरालासित भेट
गर्नुभएको थियो । मंगलबार राजदूत सुदले माओवादीका
अध्यक्ष प्रचण्डसित भेट गर्नुभएको थियो ।
उता एमाले नेताहरूले आफू
सरकारबाहिर रहने भाषण गर्दै हिँड्नु र एमाले केन्द्रीय
समिति बैठकले सरकारमा जाने-नजाने विषयमा केही निर्णय
नगर्नुलाई पनि अर्थपूर्ण रूपमा हेरिएको छ । चुनावी
हारको कुण्ठा बोकेको एमाले अमेरिकी इशारामा माओवादी
नेतृत्वको सरकारलाई असहयोग गर्ने मुडमा रहेको एकजना
असन्तुष्ट एमाले नेताले बताएका छन् ।
यसैबीच शुक्रबार बिहान आठ बजे
प्रधानमन्त्री निवास बालुवाटारमा सात दलको बैठक बस्ने
बताइएको छ । बैठकमा नयाँ सरकार निर्माण, संविधानसभाको
पहिलो बैठकको तयारी, गणतन्त्र कार्यान्वयनलगायतका
विषयमा छलफल हुने थाहा भएको छ ।
