नेपाली भूमि मिचेर भारतीय सडक निर्माण

सप्तरी २४ वैशाख । सप्तरीको सीमावर्ती गाविस छिन्नमस्तामा नेपाली भू-भाग मिचेर भारतले पक्की सडक निर्माण कार्य थालेको छ । छिन्नमस्ता गाविस वडा नं.३ स्थित सीमामा राखिएको पिलर नम्बर २२८/१ नजिकैबाट भारतले पक्की सडक निर्माण कार्य थालेको हो ।

भारतले ग्रामीण सडक योजनाअन्तर्गत दसगजा क्षेत्रमै रहेको राममनोहर लोहिया गेटबाट दक्षिण भारतीय गाउँ न्यौरसम्मको चार किलोमिटर पक्की सडक निमार्ण कार्य थालेको हो । दसगजा क्षेत्रमा बिनासहमति कुनै पनि पक्की निर्माण कार्य गर्न नपाउने नेपाल र भारतबीच भएको सम्झौताविपरीत भारतले उक्त सडक निर्माण गर्न थालेको बताइएको छ ।

सम्झौताअनुसार सीमास्तम्भको दुवैतिर दस मिटरसम्मको भू-भाग कुनै पनि देशले उपभोग गर्न पाउँदैन । भारतले एकसाता अघिदेखि सुरु गरेको निर्माण कार्यलाई तीव्रता दिएको छ । निर्माणाधीन सो सडक सात मिटर चौडाइ र दुई मिटर उचाइको छ । माटो भर्ने काम सकिएपछि लगत्तै कालोपत्रे गर्ने योजना रहेको सडक निर्माणका भारतीय ठेकेदार शिवनारायण यादवले बताए । सडक निर्माणबारे स्थानीय नेपाली बासिन्दाले राजविराजस्थित प्रशासनमा समेत जानकारी गराएका छन् ।

दसगजा क्षेत्रमा भारतले सडक निर्माण गर्न लागेको गुनासो आएपछि स्थानीय प्रशासनको एकटोलीले गत बिहीबार स्थलगत निरीक्षण गरेको थियो । निरीक्षणबाट फर्केका सशस्त्र प्रहरी बल सुरक्षा कार्यालय, राजविराजका सशस्त्र प्रहरी उपरीक्षक कमल गिरीले भारतले उक्त सडक सम्झौताविपरीत निर्माण गरिरहेको बताउनुभयो । सडक निर्माणबारे भारतका तर्फबाट आफूलाई कुनै जानकारी नआएपछि स्थानीय बासिन्दाको आग्रहमा स्थलगत निरीक्षण गर्न जाादा नेपाली भू-भाग मिचेर सडक निमार्ण गरिएको पाइएको जानकारी पनि उहाँले दिनुभयो ।

यसबारे माथिल्लो निकायलाई जानकारी गराइसकिएको र भारतीय सुरक्षा निकायसँग पनि छलफल गरिने उहाँले बताउनुभयो । गत वर्ष सिरहाको हरकट्टीमा पनि भारतले दसगजा क्षेत्र मिचेर सात किलोमिटर लामो र १५ फिट उचाइको बाँध निर्माण कार्य थालेको थियो । आधा बाँधमात्र निर्माण गर्दा पनि गत वर्षायाममा त्यस क्षेत्रका आधा दर्जनभन्दा बढी गाविस डुबानमा परेको थियो ।