माओवादी बैठक जारी

जनदिशा संवाददाता

काठमाडौं, ४ मङ्सिर : नेपाल कम्युनिष्ट पार्टी(माओवादी) केन्द्रीय समितिको पूर्णबैठक बुधबार पनि जारी रह्यो । सोमबारदेखि शुरु भएको बैठक मंगलबार नबसी बुधबार पुनः सुरु भएको हो ।

भक्तपुरको खरिपाटीमा जारीे बैठकमा पार्टी अध्यक्ष प्रचण्ड र वरिष्ठ केन्द्रीय सदस्य किरणद्वारा पहिलो दिन प्रस्तुत दस्तावेज माथि छलफल भएको प्रवक्ता कृष्णबहादुर महराले जानकारी दिनुभएको छ ।

उहाँका अनुसार बुधबारको बैठकमा सचिवालयमा रहेका केन्द्रीय सदस्यहरूले प्रस्तावबारे आ-आफ्ना धारणा राख्नुभएको थियो । पहिलो दिनको बैठकमा प्रस्ताव प्रस्तुत गरेपछि पार्टी अध्यक्ष प्रचण्डले आफूले गणतन्त्र र कार्यदिशाबारे बहस खुला गरेको बताउनुभएको थियो ।

अध्यक्षको प्रस्तावमा संघीय प्रतिस्पर्धात्मक जनपक्षीय गणतन्त्र उल्लेख गरिएको छ भने नेता किरणको प्रस्तावमा जनगणतन्त्र हुनुपर्ने उल्लेख गरिएको छ ।

बैठकमा बोल्ने सदस्यहरूले संगठन सुदृढिकरण र शुद्धिकरणमा जोड दिएका छन् । पार्टीभित्र देखापरेको विवादलाई सदस्यहरूले इतिहासकै महान् बहसको प्रक्रियाको संज्ञा दिएका छन् । एक केन्द्रीय सदस्यका अनुसार बहसले पार्टीलाई कमजोर पार्ने होईन अझ सुदृढ बनाउन सहयोग पुर्‍याउँछ ।

बैठकमा दुईजना सदस्यले दुबै अवधारणा मिलाएर लैजानुपर्ने धारणा राखेकोे बाँकी सदस्यहरूले जनगणतन्त्र र जनपक्षीय गणतन्त्रका पक्षमा आफ्नो मत राखेका थिए ।

बैठक बिहीबार बिहान सात बजे सोही स्थानमा पुनः शुरु गरिने जानकारी दिइएको छ । बिहीबारको बैठकमा बाँकी २६ जना केन्द्रीय सदस्यहरूले आ-आफ्ना धारणा राख्नेछन् ।

बैठक लम्बिएपछि आजबाट हुने भनिएको राष्ट्रिय भेला पर सरेको छ । भेलाका लागि देशभरिका राज्य समिति सदस्यहरू राजधानीमा आइसकेका नेवाः राज्य समितिले जानकारी दिएको छ । भेला बिहीबारबाट शुरु गरिने कार्यक्रम रहेको थियो ।

प्रशासन पुनःसंरचना आयोग गठन

जनदिशा संवाददाता

काठमाडौं, ४ मङ्सिर : सरकारले प्रशासन पुनःसंरचना आयोग गठन गरेको छ । मन्त्रीपरिषद्को बुधबार बसेको बैठकले सामान्य प्रशासन मन्त्री पम्फा भुसालको अध्यक्षतामा नौ सदस्यीय आयोग गठन गरेको हो ।

बैठकपछि सूचना तथा सञ्चारमन्त्री एवं सरकारी प्रवक्ता कृष्णबहादुर महराले दिनुभएको जानकारीअनुसार आयोगका सदस्यहरूमा डा.महेन्द्रनारायण मिश्र, अच्युतराज राजभण्डारी, विजया केसी, बालकृष्ण प्रसाईं, राजेन्द्रबहादुर सिंह, मुक्तिप्रसाद रिजाल, सीताराम मण्डल र डम्बर वि.क. छन् ।

आयोगले नेपालको प्रशासन संयन्त्रमा आवश्यक सुधार र भविष्यको प्रारुप समेटेर तयार पारिएको प्रतिवेदन सरकारलाई बुझाउने छ ।

मन्त्रीपरिषद् बैठकले समाजकल्याण परिषद् विघटन गर्ने निर्णय पनि गरेको छ । परिषद्मा व्यापक भ्रष्टाचार हुने गरेका कारण परिषद विघटन गरिएको प्रवक्ता महराले जानकारी दिनुभएको छ ।

त्यस्तै बैठकले बेपत्ता नागरिक खोजी गर्न बनेको ऐन पनि पारित गरेको छ । केही दिन अघि ऐनबारे सरकारले राय संकलन गरेको थियो । मन्त्रीपरिषद््ले केही राजनीतिक नियुक्तिसम्बन्धी निर्णय पनि लिएको महराले बताउनुभयो ।

जसअनुसार नेपाल दुरसंचार प्राधिकरणको अध्यक्षमा भेषराज काडेल र उदयपुर सिमेन्ट कारखानाको प्रबन्धकमा उद्ववबहादुर कार्की नियुक्त भएका छन् । त्यस्तै निजामती कर्मचारी अस्पताल सञ्चालक समितिको सदस्यमा डा.भगवान कोइराला र चित्रनाथ रिजाल थप गरिएका छन् ।

अस्पतालका कर्मचारीलाई कोठैपिच्छे तीनवटा हिटर

तिलक अधिकारी

मकवानपुर, ४ मङ्सिर : हेटौंडा अस्पतालका सबै कर्मचारी क्वाटरहरूमा हिटरको प्रयोग हुने गरेको पाइएको छ । अस्पतालको कात्तिक महिनामा उठेको बिल अध्ययन गर्दा सो कुरा खुलेको हो ।

विद्युत् महशुल अस्वाभाविक देखिएपछि यति धेरै विद्युत् के काममा खपत हुन्छ भनेर खोज्ने क्रममा अस्पतालका कर्मचारी निवासहरूमा निवासैपिच्छे दुई-तीनवटा हिटर प्रयोगमा आइरहेको भेटिएको छ ।

कर्मचारीले आफ्ना परिवारसमेत ल्याएर बस्ने गरेको र विद्युत् दुरुपयोग हुँदा सरकारलाई आर्थिक भार समेत थपिएको छ । अस्पतालका कर्मचारीहरूले एउटा कोठामा दुई-तीनवटासम्म हिटर बाल्ने र खानासमेत ग्याँस प्रयोग नगरी हिटरमै पकाउँछन । अस्पतालका एक कर्मचारीका अनुसार दुई हजार वाटसम्मका हिटर प्रत्येक कोठामा प्रयोगमा छन् । प्रत्येक कोठामा हिटरको प्रयोग हुने भएपछि कात्तिक महिनामा मात्र प्राधिकरणलाई अस्पतालले २९ हजार ८ सय ३४ रुपैयाँ महशुल बुझाउनुपर्ने भएको छ ।

सरकारले अनावश्यक खर्च कटौती गर्न निर्देशनदिइरहेका बेला अस्पतालमा भने सरकारलाई थप आर्थिक भार पार्ने काम भइरहेको छ । कर्मचारी निवासमा हिटरको व्यापक प्रयोग भइरहे पनि अस्पतालका भग्नावशेषमा समेत हिटर राखिएको पाइन्छ ।